ଭାରତରେ ଚିତା ସଂଖ୍ୟା ୬୨କୁ ବୃଦ୍ଧି, ୪ ଶାବକଙ୍କୁ ଜନ୍ମ ଦେଲା ମାଈ ଚିତା । ବୋତ୍ସୱାନାରୁ ଆସିଥିବା ମାଈ ଚିତା KOMG 3 ମୁକ୍ତ ଜଙ୍ଗଲରେ ୪ଟି ସୁସ୍ଥ ଶାବକଙ୍କୁ ଜନ୍ମ ଦେଇଛି । ଭାରତରେ ଚିତା ସଂଖ୍ୟା ୬୨କୁ ବୃଦ୍ଧି ପାଇଛି । ବୋତ୍ସୱାନାରୁ ଅଣାଯାଇଥିବା ଅଢ଼େଇ ବର୍ଷର ମାଈ ଚିତା KOMG 3 ମୁକ୍ତ ଜଙ୍ଗଲରେ ୪ଟି ସୁସ୍ଥ ଶାବକଙ୍କୁ ଜନ୍ମ ଦେଇଛି ।
ଏହା ସହିତ ଭାରତରେ ଜନ୍ମ ନେଇଥିବା ଚିତାଙ୍କ ସଂଖ୍ୟା ୪୩ରେ ପହଞ୍ଚିଛି । ବୋତ୍ସୱାନାରୁ ଭାରତକୁ ଅଣାଯାଇଥିବା ମାଈ ଚିତାଙ୍କ ମଧ୍ୟରେ KOMG 3 ପ୍ରଥମ ଥର ପାଇଁ ଶାବକ ଜନ୍ମ ଦେଇଛି । ଏହି ମାଈ ଚିତା ୪ ମାସରୁ ଅଧିକ ସମୟ ଧରି ମୁକ୍ତ ଜଙ୍ଗଲରେ ରହୁଥିଲା । ପ୍ରାକୃତିକ ପରିବେଶରେ ଏହା ୪ଟି ଶାବକଙ୍କୁ ଜନ୍ମ ଦେଇଥିବା ସୂଚନା ମିଳିଛି ।
୨୦୨୨ ମସିହାରେ ଭାରତରେ ଚିତା ପୁନଃପ୍ରଚଳନ କାର୍ଯ୍ୟକ୍ରମ ଆରମ୍ଭ ହୋଇଥିଲା । ସେବେଠାରୁ ମୁକ୍ତ ଜଙ୍ଗଲରେ ଚିତା ଶାବକ ଜନ୍ମ ହେବାର ଏହା ଦ୍ୱିତୀୟ ରେକର୍ଡ ଘଟଣା । ଦେଶରେ ଚିତାଙ୍କ ବଂଶବୃଦ୍ଧି ଓ ସଂରକ୍ଷଣ ଦୃଷ୍ଟିରୁ ଏହା ଏକ ସକାରାତ୍ମକ ସଙ୍କେତ ।
ପ୍ରୋଜେକ୍ଟ ଚିତା ଅଧୀନରେ ଚିତାଙ୍କ ଯତ୍ନ, ସ୍ୱାସ୍ଥ୍ୟ ପରୀକ୍ଷା, ଗତିବିଧି ଉପରେ ନଜର ରଖିବା ଏବଂ ସେମାନଙ୍କ ପାଇଁ ଉପଯୁକ୍ତ ପ୍ରାକୃତିକ ପରିବେଶ ସୁନିଶ୍ଚିତ କରିବାକୁ ଗୁରୁତ୍ୱ ଦିଆଯାଉଛି । ଏହି କାର୍ଯ୍ୟକ୍ରମରେ ବନ ବିଭାଗର ଅଧିକାରୀ, ପ୍ରାଣୀ ଚିକିତ୍ସକ, କ୍ଷେତ୍ରସ୍ତରୀୟ ବନ କର୍ମଚାରୀ ଓ ଅନ୍ୟ ସମ୍ପୃକ୍ତ କର୍ମଚାରୀମାନେ ନିୟୋଜିତ ଅଛନ୍ତି । ଭାରତରେ ଚିତାଙ୍କ ଏକ ସ୍ଥାୟୀ ଓ ପ୍ରଜନନକ୍ଷମ ସଂଖ୍ୟା ଗଠନ କରିବା ପ୍ରୋଜେକ୍ଟ ଚିତାର ମୁଖ୍ୟ ଉଦ୍ଦେଶ୍ୟ । ନୂଆ ଜନ୍ମିତ ଶାବକଙ୍କ ସୁରକ୍ଷା ଓ ସ୍ୱାଭାବିକ ବିକାଶ ଉପରେ ଆଗାମୀ ଦିନରେ ନଜର ରହିବ ।
