OdiaInfo Loading

UPIରେ ଐତିହାସିକ ରେକର୍ଡ! ପ୍ରଥମ ଥର ୩୦ ଲକ୍ଷ କୋଟି ପାର୍ କଲା କାରବାର

ନୂଆଦିଲ୍ଲୀ: ଚା’ ଦୋକାନଠାରୁ ଆରମ୍ଭ କରି ବଡ଼ ବଡ଼ ସପିଂ ମଲ୍‌ ପର୍ଯ୍ୟନ୍ତ, ଏବେ ସବୁଠି ଡିଜିଟାଲ ପେମେଣ୍ଟର ରାଜ୍‌। ପକେଟରେ ନଗଦ ଟଙ୍କା ନଥିଲେ ମଧ୍ୟ QR କୋଡ୍ ସ୍କାନ୍ କରି ମାତ୍ର କେଇ ସେକେଣ୍ଡରେ ହେଉଛି ଟଙ୍କା କାରବାର। ଏହାର ପ୍ରଭାବ ଏବେ UPI କାରବାରର ରେକର୍ଡରେ ସ୍ପଷ୍ଟ ଦେଖିବାକୁ ମିଳିଛି। ଭାରତର ଡିଜିଟାଲ ପେମେଣ୍ଟ ବ୍ୟବସ୍ଥା ଏକ ନୂଆ ଇତିହାସ ରଚିଛି। ପ୍ରଥମ ଥର ପାଇଁ ଅକ୍ଟୋବର ମାସରେ UPI କାରବାରର ମୋଟ ମୂଲ୍ୟ ୩୦ ଲକ୍ଷ କୋଟି ଟଙ୍କା ସୀମା ଅତିକ୍ରମ କରି ୩୧.୫୩ ଲକ୍ଷ କୋଟି ଟଙ୍କାରେ ପହଞ୍ଚିଛି। ଏହି ରେକର୍ଡ ଭାରତରେ ଡିଜିଟାଲ ଅର୍ଥନୀତିର ଦ୍ରୁତ ଅଭିବୃଦ୍ଧିକୁ ପ୍ରମାଣିତ କରୁଛି।

ଅକ୍ଟୋବରରେ ଭାଙ୍ଗିଲା ସବୁ ରେକର୍ଡ

ଭାରତୀୟ ଜାତୀୟ ପେମେଣ୍ଟ ନିଗମ (NPCI)ର ତଥ୍ୟ ଅନୁଯାୟୀ, ଅକ୍ଟୋବରରେ UPI ମାଧ୍ୟମରେ ମୋଟ ୩୧.୫୩ ଲକ୍ଷ କୋଟି ଟଙ୍କାର କାରବାର ହୋଇଛି। ଏହା ପୂର୍ବରୁ ସେପ୍ଟେମ୍ବରରେ ୨୯.୩୭ ଲକ୍ଷ କୋଟି ଟଙ୍କାର କାରବାର ହୋଇଥିଲା। ଅର୍ଥାତ୍ ମାସକ ମଧ୍ୟରେ କାରବାରରେ ଉଲ୍ଲେଖନୀୟ ବୃଦ୍ଧି ଘଟିଛି। ଗତବର୍ଷ ଅକ୍ଟୋବରରେ UPI କାରବାରର ମୂଲ୍ୟ ୨୭.୨୭ ଲକ୍ଷ କୋଟି ଟଙ୍କା ଥିବାବେଳେ ଚଳିତ ବର୍ଷ ଏହା ପ୍ରାୟ ୧୬ ପ୍ରତିଶତ ବୃଦ୍ଧି ପାଇଛି। କେବଳ କାରବାରର ମୂଲ୍ୟ ନୁହେଁ, ସଂଖ୍ୟା କ୍ଷେତ୍ରରେ ମଧ୍ୟ ନୂଆ ରେକର୍ଡ ସୃଷ୍ଟି ହୋଇଛି। ଅକ୍ଟୋବରରେ ମୋଟ ୨୫.୪୭ ବିଲିୟନ UPI କାରବାର ହୋଇଛି, ଯାହା ବାର୍ଷିକ ଆଧାରରେ ୨୩ ପ୍ରତିଶତ ଅଧିକ।

ଦୈନିକ କାରବାର ୧ ଲକ୍ଷ କୋଟି ପାର୍

UPIର ଲୋକପ୍ରିୟତା କେତେ ଦ୍ରୁତ ଗତିରେ ବଢ଼ୁଛି, ତାହା ଦୈନିକ କାରବାରରୁ ସ୍ପଷ୍ଟ ହେଉଛି। ଅକ୍ଟୋବରରେ ପ୍ରଥମ ଥର ପାଇଁ UPIର ହାରାହାରି ଦୈନିକ କାରବାର ମୂଲ୍ୟ ୧ ଲକ୍ଷ କୋଟି ଟଙ୍କା ଅତିକ୍ରମ କରିଛି। ଏହି ସମୟରେ ପ୍ରତିଦିନ ହାରାହାରି ୧,୦୧,୭୦୭ କୋଟି ଟଙ୍କାର କାରବାର ହୋଇଛି। ସେହିପରି ଦୈନିକ ହାରାହାରି କାରବାର ସଂଖ୍ୟା ୮୨.୨ କୋଟିରେ ପହଞ୍ଚିଛି। ଅର୍ଥାତ୍ ପ୍ରତିଦିନ କୋଟି କୋଟି ଲୋକ UPI ମାଧ୍ୟମରେ ଟଙ୍କା ପଠାଇବା, ଗ୍ରହଣ କରିବା ଏବଂ QR କୋଡ୍ ସ୍କାନ୍ କରି ସାମଗ୍ରୀ କିଣିବାରେ ଏହି ବ୍ୟବସ୍ଥାକୁ ବ୍ୟବହାର କରୁଛନ୍ତି।

ନଭେମ୍ବରରେ ଆହୁରି ବଡ଼ ରେକର୍ଡ ଆଶା

ଅକ୍ଟୋବରର ରେକର୍ଡକୁ ନଭେମ୍ବର ମାସରେ ମଧ୍ୟ ଟପିବାର ସମ୍ଭାବନା ରହିଛି। ପାର୍ବଣ ଋତୁ, ଦୀପାବଳିର କିଣାକିଣି ଏବଂ ବିବାହ ଋତୁ ଯୋଗୁଁ ଡିଜିଟାଲ ପେମେଣ୍ଟର ବ୍ୟବହାର ବଢ଼ିଛି। ନଭେମ୍ବର ୭ ତାରିଖରେ ଗୋଟିଏ ଦିନରେ ୧,୩୬,୧୧୮ କୋଟି ଟଙ୍କାର UPI କାରବାର ରେକର୍ଡ ହୋଇଥିବା ସୂଚନା ମିଳିଛି। ନଭେମ୍ବରର ପ୍ରଥମ ଚାରି ଦିନରେ ହାରାହାରି ଦୈନିକ କାରବାର ମୂଲ୍ୟ ୧.୨୯ ଲକ୍ଷ କୋଟି ଟଙ୍କାରେ ପହଞ୍ଚିଛି। ଏହା ଅକ୍ଟୋବରର ଦୈନିକ ହାରାହାରି କାରବାର ତୁଳନାରେ ଅଧିକ। ବିଶେଷକରି ସୁନା ଓ ରୁପା ଅଳଙ୍କାର, ପୋଷାକ, ଇଲେକ୍ଟ୍ରୋନିକ୍ସ ସାମଗ୍ରୀ ଏବଂ ବିବାହ ସମ୍ପର୍କିତ କିଣାକିଣିରେ UPIର ବ୍ୟବହାର ବଢ଼ିଛି।

ନଗଦ ଟଙ୍କାକୁ ପଛରେ ପକାଉଛି UPI

ଦିନ ଥିଲା, ଛୋଟରୁ ବଡ଼ ସବୁ କାରବାର ପାଇଁ ଲୋକେ ନଗଦ ଟଙ୍କା ଉପରେ ନିର୍ଭର କରୁଥିଲେ। କିନ୍ତୁ ଏବେ ମୋବାଇଲ୍ ଫୋନ୍ ହିଁ ପାଲଟିଛି ଡିଜିଟାଲ ପର୍ସ। ଗାଁର ଛୋଟ ଦୋକାନଠାରୁ ସହରର ବଡ଼ ବ୍ୟବସାୟିକ ପ୍ରତିଷ୍ଠାନ ପର୍ଯ୍ୟନ୍ତ UPI ପେମେଣ୍ଟର ପ୍ରସାର ହୋଇଛି। ତେଣୁ ଡିଜିଟାଲ ପେମେଣ୍ଟ ଆଉ କେବଳ ଏକ ବିକଳ୍ପ ହୋଇ ରହିନାହିଁ, ବରଂ ଦୈନନ୍ଦିନ ଜୀବନର ଏକ ଅବିଚ୍ଛେଦ୍ୟ ଅଂଶ ପାଲଟିଛି। ୩୦ ଲକ୍ଷ କୋଟିର ସୀମା ଅତିକ୍ରମ କରିବା UPIର ଏହି ସଫଳତା ଭାରତର ଡିଜିଟାଲ ପେମେଣ୍ଟ ବ୍ୟବସ୍ଥା ପାଇଁ ଏକ ବଡ଼ ମାଇଲଖୁଣ୍ଟ। ଆଗକୁ ବିବାହ ଋତୁ ଓ ଅନ୍ୟାନ୍ୟ ଉତ୍ସବ ଥିବାରୁ ନଭେମ୍ବରରେ ଏହି କାରବାର ଆଉ କେଉଁ ନୂଆ ରେକର୍ଡ ସୃଷ୍ଟି କରୁଛି, ତାହା ଉପରେ ଏବେ ସମସ୍ତଙ୍କ ନଜର।

Leave a Reply

Your email address will not be published. Required fields are marked *